Shu kunlarda O‘zbekiston Respublikasi Bojxona qo‘mitasi Raisi A.Mavlonov boshchiligidagi delegatsiya Amerika qo‘shma shtatlarida bo‘lib, bojxona sohasidagi hamkorlikni kuchaytirishga qaratilgan muhim uchrashuvlar va muzokaralar olib borishmoqda. Bu haqida qo‘mita matbuot xizmati xabar bermoqda.
Tashrifning asosiy voqeligi – Vashingtonda O‘zbekiston Respublikasi Bojxona qo‘mitasi Raisi A.Mavlonov hamda AQSHning Bojxona chegara xizmati komissari Troy Miller o‘rtasida ikki tomonlama uchrashuv bo‘lib o‘tdi.
Ta’kidlashlaricha, O‘zbekiston-AQSH o‘rtasida diplomatik aloqalar yo‘lga qo‘yilganidan so‘ng o‘tgan 32 yil davomida ikkala davlat bojxona xizmatlari rahbarlari o‘rtasida bu formatdagi yuzma-yuz rasmiy uchrashuv ilk bor o‘tkazilmoqda. Shu boisdan hozirga qadar o‘zaro hamkorlikning huquqiy asosi ham mavjud bo‘lmagan.
Shuning uchun ham muzokaralarda asosiy e’tibor bojxonada xavflarni monitoring qilish, bojxona tartibotlarini raqamlashtirish hamda inson resurslaridan samarali foydalanish kabi dolzarb masalalarga qaratilgan.
Uchrashuvnining tarixiy ahamiyati shundaki, O‘zbekiston-AQSH bojxona xizmati rahbarlari bojxona sohasidagi hamkorlikning muhim huquqiy asosi - “Hamkorlik va o‘zaro yordam to‘g‘risida”gi Bitimni imzolashgan.
O‘zaro munosabatlarda yangi sahifa ochuvchi mazkur hujjat O‘zbekiston va AQSH o‘rtasida bojxona sohasida axborot almashish imkonini beradi va giyohvand moddalar savdosi, odam savdosi, transmilliy jinoiy guruhlar, jinoiy daromadlarni legallashtirish, bojxona to‘lovlaridan bo‘yin tovlashga qarshi kurashishda hamkorlikning yanada mustahkamlanishiga xizmat qiladi.
E’tiborli tomoni shundaki, AQSH bojxona sohasida hamkorlikni nazarda tutuvchi bu kabi ikki tomonlama bitimlarni dunyo bo‘ylab 200 ga yaqin davlatlar ichida atigi 17 ta davlat bilan imzolagan bo‘lsa, O‘zbekiston bu ro‘yxatda 18-davlat sifatida qayd etilmoqda.
