Avval Toshkentda poyga vaqtida haydovchi avtotuning_uz Instagram sahifasi asoschisini urib yuborgani, jabrlanuvchi shifoxonada vafot etgani haqida xabar berilgan edi.
Ushbu jinoyat ishi sudda ko‘rib chiqilgan va haydovchi 2 yilga transport vositalarini boshqarish huquqidan va 3 yilga ozodlikdan mahrum qilgan.
Sud qarorida haydovchi bir qator yo‘l harakati qoidalarini buzgan holda 60−70 km/soat tezlikda piyodani urib yuborgani qayd etilgan.
Toshkent shahar sudi Matbuot xizmatining xabar qilishicha, 12 sentyabr kuni Toshkent shahar sudida jinoyat ishi apellyatsiya tartibida qayta ko‘rib chiqilgan.
Toshkent shahri sudi sudyasi Muzaffar Ahmedov raisligidagi sudlov hay’atining yig‘ilishida qamoqda saqlangan 4 oy 2 kun jazodan chegirilib, o‘tash uchun qolgan 2 yil 7 oy 28 kunlik ozodlikdan mahrum qilish jazosi shartli hisoblandi va 2 yil sinov muddati belgilandi. Sudlanuvchiga nisbatan qo‘llanilgan “qamoq olish” tarzidagi ehtiyot chorasi bekor qilinib, sud zalidan qamoqdan ozod qilingan.
Ma’lumot uchun, JKning 266-moddasi 2-qismida jazo tariqasida — muayyan huquqdan mahrum qilib, yetti yilgacha ozodlikdan mahrum qilish jazosi belgilangan.
