Ijtimoiy tarmoqlarda Yangiyo‘l tumanidagi mahallardan birida xonadonda tutqinlikda ushlab turilgan ilonlar qo‘yib yuborilgani aks etgan videolar tarqaldi.
Toshkent viloyati Ekologiya boshqarmasi tomonidan 2 oktyabr kuni Yangiyo‘l tumani "Tuyabo‘g‘iz" MFY hududida fuqaroning xonadonida saqlangan kobra ilonlarni qo‘yib yuborilganligi holati bo‘yicha ishchi guruh tuzilgan.
Aniqlanishicha, mahallada yashovchi 1980 yilda tug‘ilgan fuqaro N.Yu. o‘zi yashayotgan xonadonida 30 dan ortiq "Osiyo kobra" ilonlarini tegishli ruxsatnomalarsiz saqlab kelgan. Noma’lum sabablarga ko‘ra, u xonadonida saqlanayotgan ilonlar ochiqqa qo‘yib yuborilgan. Bu holat mahalliy aholi tomonidan aniqlanib, ikkita kobra iloni tutib o‘ldirilgan.
Hozirgi vaqtda ishchi guruh tomonidan shu yaqin atrofda yashovchi aholi xonadonlarida dorilash ishlari olib borilmoqda.
Kobra boqqan shaxsga nisbatan IIB xodimlari tomonidan dastlabki surishtiruv olib borilayotgani ma’lum qilinadi, deyiladi Toshkent viloyati Ekologiya boshqarmasi matbuot xizmati xabarida.
