Qashqadaryoda maktab o‘quvchisi o‘qituvchi kaltaklagani aks etgan video ijtimoiy tarmoqlarda keng tarqaldi. Ushbu holat yuzasidan Qashqadaryo viloyati maktabgacha va maktab ta’limi boshqarmasi matbuot xizmati munosabat bildirdi.
Aniqlanishicha, holat joriy yilning 9 oktyabr kuni Shahrisabz tuman 33-umumiy o‘rta ta’lim maktabida soat 10:30 atrofida sodir bo‘lgan. Ma’lum bo‘lishicha, maktabning ingliz tili fani o‘qituvchisi U.S. (ayol kishi) 5-"b" sinf o‘quvchisi M.P.ga maktabdagi "boshqa o‘quvchilarga hurmatsizlik qilma" deb ta’kidlaganidan so‘ng, o‘quvchi M.P. o‘qituvchini haqoratlashga uringan.
Shundan so‘ng, maktab o‘qituvchisi U.S. o‘quvchi M.P.ni ma’naviyat xonasiga olib borishga uringanda qo‘li bexosdan o‘quvchi burniga tegib ketganligi oqibatida burun sohasidan qon kelishi holati yuzaga kelgan.
O‘quvchi M.P. onasini mazkur ta’lim tashkilotiga olib kelgan va o‘qituvchi hamda M.P.ning onasi o‘rtasida janjal sodir etilgan, — deya izoh bergan maktab ma’muriyati.
"Holat yuzasidan tezkorlik bilan Shahrisabz tumanidagi 33-sonli umumiy o‘rta ta’lim maktabi direktori tomonidan huquqni muhofaza qiluvchi organlarga murojaat qilingan. Hozirda o‘qituvchi U.S. murojaati Shahrisabz tuman IIB mas’ullari ishtirokida atroflicha o‘rganilmoqda", - deyiladi munosabatda.
Ushbu holat yuzasidan Qashqadaryo viloyati IIB matbuot xizmati ham izoh berdi.
"Mazkur holat yuzasidan Shahrisabz tuman IIB tomonidan tergovga qadar tekshiruv harakatlari olib borilmoqda. Holat yuzasidan qo‘shimcha axborot beriladi", - deyiladi xabarda.
