16 yoshli o‘smirning o‘limiga sabab bo‘lgan, 163 nafar odam jarohatlangan Sergelidagi portlash bo‘yicha sud ishi yakunlandi va sudlanuvchilarga hukm o‘qildi. Bu haqda Zokirjon Qo‘ziboyev - Toshkent shahar sudi matbuot kotibi darakchi.uz'ga xabar berdi.
Bugun, 11 oktyabr kuni jinoyat ishlari bo‘yicha Mirobod tuman sudi binosida bo‘lib o‘tgan sud majlisida to‘rt nafar sudlanuvchi S.F., A.F., B.S. va N.K. O‘zbekiston Respublikasi Jinoyat kodeksining 259-moddasi (Yong‘in xavfsizligi qoidalarini buzish) 2-qismi “a” va “b” bandlari bilan aybli deb topildi va ularga shu modda bilan ikki yil rahbarlik va yong‘in xavsizligi yuklatilgan vazifalarda ishlash huquqidan mahrum etilib, 5 yil muddatga ozodlikdan mahrum qilish jazosi tayinlandi. Tayinlangan jazo manzil koloniyada o‘tattirilishi belgilandi va jazo muddati 2023 yil 29 sentyabrdan boshlab hisoblanishi aytildi. Ularga nisbatan qo‘llanilgan “qamoqqa olish” tarzidagi ehtiyot chorasi aslicha qoldirildi.
Shuningdek, fuqaroviy da’vogarlar va jinoyat ishida jabrlanuvchilar deb e’tirof etilgan “S.S.” MCHJ, “A-O” MCHJ, “A.S.” MCHJlarning sudga kiritgan da’vo arizalari qanoatlantirildi.
Sud hujjatida jabrlanuvchi va fuqaroviy da’vogarlarga sudlanuvchi S.F., A.F., B.S., N.K., va fuqaroviy javobgarlar “Interlogistics” MCHJ QK, “Polychem” MCHJ solidar tartibda undirilishi belgilangan.
Hukm ustidan apellyatsiya shikoyati va protestlari hukm e’lon qilingan kundan e’tiboran o‘n sutka ichida, sudlanuvchi va jabrlanuvchi tomonidan esa ularga hukmning ko‘chirma nusxasi topshirilgan kundan e’tiboran shu muddat ichida hukm chiqargan sud orqali Toshkent shahar sudiga, hukm qonuniy kuchga kirgandan so‘ng esa, kassatsiya tartibida berilishi mumkinligi bildirildi.
Sergelidagi portlash
O‘tgan yilning 28 sentyabr kuni tunda Toshkent shahri Sergeli tumanidagi "Quruvchilar" dahasida "Inter Logistics" MCHJga qarashli omborxonada kuchli portlash sodir bo‘ldi. Oqibatda hududdagi 26 ta ko‘p qavatli uyning 592 ta xonadoni hamda 8 ta xizmat ko‘rsatish shoxobchasi, 1 ta maktab va 2 ta MTT binolarining fasad qismi hamda deraza-romlariga zarar etdi.
Shuningdek, portlashda 163 nafar fuqaro jabrlandi va hodisa oqibatida 2006 yilda tug‘ilgan bir nafar o‘smir voqea joyida vafot etdi.
Favqulodda holat oqibatlarini bartaraf etishga Milliy gvardiya otryadlari jalb etildi va voqea joyiga Toshkent shahar hokimi Shavkat Umurzoqov va Bosh vazir Abdulla Aripov yetib borib, holatni nazoratga oldi. Shahar hokimining ma’lum qilishicha, yetkazilgan moddiy zarar qoplab beriladi.
Omborxonada sodir bo‘lgan portlashdan so‘ng Hukumat qarori bilan 4 kishi qamoqqa olindi. Ma’lum qilinishicha, holat yuzasidan Ichki ishlar vazirligi Tergov departamenti tomonidan Jinoyat kodeksining 259-moddasi 2-qismi “a” va “b” bandlari bilan jinoyat ishi qo‘zg‘atilgan.
