Majburiy ijro byurosining Bo‘ka tumani bo‘limi ish yurituvida bo‘lgan fuqarolik ishlari bo‘yicha Bekobod tumanlararo sudining ijro varaqasiga asosan, qarzdor A.Meliyevdan, undiruvchi U.Meliyeva foydasiga 2 nafar voyaga yetmagan farzandining moddiy ta’minoti uchun jami 48.772,5 ming so‘m aliment mablag‘ini to‘lashdan qasddan bo‘yin tovlaganligi sababli bo‘lim davlat ijrochilari tomonidan qidiruvga berilgan.
Boshqarmaning qidiruv xodimlari tomonidan o‘tkazilgan tadbir natijasida aliment to‘lashdan qochib yurgan fuqaro Ohangaron tumanidagi tog‘lardagi cho‘ponlar chaylasidan topilgan. Tegishli tartibda dalolatnoma tuzilib, qarzdor shaxsni Byuroning Bo‘ka tumani bo‘limiga olib kelinib, davlat ijrochisiga topshirilgan.
Joriy yilning 28 oktyabrida unga nisbatan JKning 122-moddasi 1-qismi bilan jinoyat ishi qo‘zg‘atilib, boshqarma surishtiruvchilari tomonidan surishtiruv harakatlari olib borilmoqda.
