“Hududiy elektr tarmoqlari” aksiyadorlik jamiyati boshqaruvi raisi Asrorjon Asqarov yangi yil va bayram kunlari – 2024 yil 30 dekabrdan 2025 yil 3 yanvargacha iste’molchilarni barqaror elektr energiyasi bilan ta’minlashga bag‘ishlangan elektr tarmoqlari shtabining yig‘ilishini o‘tkazdi. Bu haqda Jamiyat Matbuot xizmati xabar qildi.
Tarmoqlarda yuzaga kelishi mumkin bo‘lgan nosozliklarni bartaraf etish maqsadida “Hududiy elektr tarmoqlari” AJda 1395 ta maxsus avariya brigadalari (6466 kishi va 1334 ta texnika) tunu kun faoliyat yuritishi belgilangan.
Zarur bo‘lganda, iste’molchilarni elektr energiyasi bilan ta’minlash uchun 100dan ortiq umumiy quvvati 90.000 kVA bo‘lgan ko‘chma zaxira quvvat manbalari (dizel elektr stansiyalari) shay holatga keltirilgan.
Shu bilan bir qatorda, 30 dekabrdan 3 yanvarga qadar barcha energetika obyektlarida “texnologik osoyishtalik” ya’ni, elektr qurilmalarida rejali ta’minlash ishlari amalga oshirilmaslik rejimi joriy etilmoqda.
"Agar siz bayram kunlari elektr energiyasi ta’minoti bo‘yicha qandaydir muammoga duch kelsangiz, elektr energiyasi ta’minoti yuzasidan 1154 qisqa raqamiga, shuningdek, Telegram’dagi @het_admin administratorga murojaat qilishingiz mumkinligini eslatib o‘tamiz", - deyiladi xabarda.
