2024 yilda jinoyat ishlari bo‘yicha sudlar tomonidan 469 568 nafar shaxsga nisbatan ma’muriy jazolar qo‘llanildi. Bu haqida Oliy sud xabar berdi.
Sudlar tomonidan ko‘rilgan ma’muriy ishlarning aksariyati quyidagi huquqbuzarliklar bilan bog‘liq:
— mayda bezorilik;
— avtomobil transportida yo‘lovchilar tashish faoliyati bilan litsenziyasiz shug‘ullanish;
— ichki ishlar organlari xodimining qonuniy talablarini bajarmaslik;
— haqorat qilish, elektr, issiqlik energiyasi, gazdan foydalanish qoidalarini buzish;
— transport vositalari haydovchilarining yo‘l harakati qoidalarini buzishi jabrlanuvchiga yengil tan jarohati yoki ancha miqdorda moddiy zarar yetkazilishiga olib kelishi;
— savdo yoki xizmat ko‘rsatish qoidalarini buzish, jamoat joylarida alkogol mahsulotini iste’mol qilish, transport vositalarini mast holda boshqarish va sovuq qurolni yoki sovuq qurol sifatida foydalanishi mumkin bo‘lgan ashyolarni olib yurish.
2024 yilda transport vositalari haydovchilarining yo‘l harakati qoidalarini buzishi jabrlanuvchiga yengil tan jarohati yoki ancha miqdorda moddiy zarar yetkazilishiga olib kelishi bilan bog‘liq ma’muriy huquqbuzarlik bo‘yicha 40 119 nafar shaxsga nisbatan 39 270 ta ish ko‘rib tamomlangan. Shundan 26 063 nafar shaxsga nisbatan jarima va transport vositasini boshqarish huquqidan mahrum etish kabi ma’muriy jazolar qo‘llanildi.
