Avvalroq Ohangaronda patrul-post xizmati (PPX) xodimi voyaga yetmagan qizlarga tegasohg‘lik qilgani haqida tarqalgan xabarlar rasman rad etildi.
Toshkent viloyati IIBB maʼlumotiga ko‘ra, o‘tkazilgan surishtiruvlar davomida mazkur iddaolar tasdig‘ini topmagan. Qayd etilishicha, voqea 27 aprel kuni tungi soat 00:40 atrofida sodir bo‘lgan.
Aniqlanishicha, PPX xodimiga uning 22 yoshli tanishi — A.K. (ayol) qo‘ng‘iroq qilib, maslahat uchun chaqirgan. Xodim yetib borganida, ayol o‘zining 14 yoshli tanishi bilan birga uning avtomashinasiga o‘tirgan. Maʼlumotda taʼkidlanishicha, voyaga yetmagan qiz xodimga hech qanday aloqasi bo‘lmagan.
Shu vaqtda 18 yoshli A.X. yana to‘rt nafar tanishi bilan kelib, xodimni haqorat qilgan va janjal chiqargani aytilmoqda. Uning 14 yoshli qizga qarindosh emasligi ham qayd etilgan.
Voyaga yetmagan shaxs ishtirok etgani sababli holat tafsilotlari to‘liq ochiqlanmagan. Masʼul idoralarga ko‘ra, tekshiruv yakuniga ko‘ra yolg‘on axborot tarqatgan shaxslarga nisbatan maʼmuriy, zarur hollarda esa jinoiy javobgarlik choralari ko‘riladi.
