Kecha, 11 fevral kuni, Moskvadagi vaqtinchalik saqlash markazi xodimlari hamda O‘zbekiston Respublikasi Ichki ishlar vazirligi ko‘magida, uch nafar O‘zbekiston fuqarosi bo‘lgan voyaga yetmagan bolalar Vatanga qaytarildi. Bu haqda Ijtimoi himoya milliy agentligi xabar qildi.
Ma’lum bo‘lishicha, ushbu bolalardan biri onasi bilan, ikkinchisi esa ota-onasining ishonchnomasi asosida buvisi bilan, uchinchisi ham ishonchnoma asosida opalari bilan birga mehnat muhojiri sifatida Rossiyaga kelgan.
Bolalarning yaqin qarindoshlari mamlakat hududida bo‘lib turish qoidalarini buzganligi sababli deportatsiya qilingan, bolalar esa Moskva shahridagi Voyaga yetmagan huquqbuzarlarni vaqtincha saqlash markaziga joylashtirilgan.
Ijtimoiy himoya milliy agentligi, hududiy "Inson" markazlari xodimlari, ijtimoiy xodim va psixologlardan iborat ishchi guruh tomonidan bolalarning vataniga qaytishini ta’minlash va ularni ota-onalariga topshirish uchun barcha zarur ijtimoiy yordam ko‘rsatish ishlari amalga oshirildi.
Xorijda og‘ir hayotiy vaziyatga tushib qolgan bolalarni qaytarish va ularga ijtimoiy yordam ko‘rsatish ishlari izchil davom ettirilmoqda.
