Ichki ishlar vazirligi hujjatlar uchun raqamlarni pullik asosda tanlash imkoniyatini nazarda tutuvchi hukumat qarori loyihasini jamoatchilik muhokamasi uchun e’lon qildi.
Tashabbus ID-karta, xorijga chiqish biometrik pasporti (zagranpasport), haydovchilik guvohnomasi va avtomototransport vositasi ro‘yxatdan o‘tkazilganligi to‘g‘risidagi guvohnoma kabi hujjatlarga taalluqli.
Hujjatda ta’kidlanganidek, bu fuqarolar o‘rtasida ushbu hujjatlarni istalgan raqamlar kombinatsiyasi bilan olishga bo‘lgan talab tobora ortib borayotgani bilan bog‘liq.
Kombinatsiyalashgan raqamlarni sotish vakolatli organ - IIV Migratsiya va fuqarolikni rasmiylashtirish bosh boshqarmasi tomonidan taqdim etilgan ro‘yxat asosida axborot tizimi orqali tashkil etilishi rejalashtirilmoqda.
Raqamlarni tanlash va sotib olish onlayn tarzda amalga oshirilishi taklif etiladi, bunda raqamlar seriyasi sotuv jarayonida ishtirok etmaydi.
Loyiha muhokamasi 8 martga qadar davom etadi.
