O‘zbekistonda xizmat ko‘rsatgan madaniyat xodimi, Yozuvchilar uyushmasi azosi, tarjimon va yozuvchi Shodmon Otabek 79 yoshida Toshkent shahrida vafot etdi, deya xabar bermoqda uyushma matbuot xizmati.
Shodmon Otabek 1946 yili Andijon viloyatining Shirmonbuloq qishlog‘ida tug‘ilgan. 1969 yili hozirgi Mirzo Ulug‘bek nomidagi Milliy universitetni bitirgan. Respublika radiosida, O‘zbekiston Milliy kinokompaniyasida, Toshkent davlat madaniyat institutida, «O‘zbekiston adabiyoti va san’ati» gazetasida ishlagan. 1992 yildan 2003 yilgacha «Xabar» gazetasida bosh muharrir bo‘lgan.
Turli yillarda yozuvchining «Mirzakalon Ismoiliy» (1978), «Yaproqdagi nur» (1979), «Odamiylik sinovlari» (1986), «Eng baxtli kun», «Qorbo‘ron», (1988, 2009), «Shaxmat abadiydir» (1990), «Shirmonbuloq oqshomlari» (1995) kabi kitoblari, shuningdek, «Yaxshi kunlarda ko‘rishaylik», «Birkam dunyo» qissalari chop etilgan. Adib atoqli yozuvchi Mirzakalon Ismoiliy haqidagi ilmiy izlanishlarini davom ettirib, 2010 yili «Mirzakalon Ismoiliy saboqlari» degan kitobini nashr ettirgan.
