Ўзбекистонда хизмат кўрсатган маданият ходими, Ёзувчилар уюшмаси азоси, таржимон ва ёзувчи Шодмон Отабек 79 ёшида Тошкент шаҳрида вафот этди, дея хабар бермоқда уюшма матбуот хизмати.
Шодмон Отабек 1946 йили Андижон вилоятининг Ширмонбулоқ қишлоғида туғилган. 1969 йили ҳозирги Мирзо Улуғбек номидаги Миллий университетни битирган. Республика радиосида, Ўзбекистон Миллий кинокомпаниясида, Тошкент давлат маданият институтида, «Ўзбекистон адабиёти ва санъати» газетасида ишлаган. 1992 йилдан 2003 йилгача «Хабар» газетасида бош муҳаррир бўлган.
Ёзувчининг «Мирзакалон Исмоилий», «Япроқдаги нур», «Одамийлик синовлари», «Энг бахтли кун», «Қорбўрон», «Шахмат абадийдир», «Ширмонбулоқ оқшомлари» каби китоблари бор. Ёзувчи Мирзакалон Исмоилий ҳақидаги илмий изланишларини давом эттириб, 2010 йили «Мирзакалон Исмоилий сабоқлари» деган китобини нашр эттирган.
