Niderlandiya Davlat prokuraturasi 27-mart kuni Amsterdamda piyodalarga pichoq bilan hujum qilgan 30 yoshli Ukraina fuqarosi besh kishini o‘ldirishga urinishda terrorchilik maqsadiga ega bo‘lgani uchun gumonlanayotganini ma’lum qildi.
Biroq uning aniq qanday sabablarga asoslangani hali ham rasman ma’lum qilinmagan. Hujum sodir etilgan kuniyoq qo‘lga olingan Ukraina fuqarosi hibsda qolmoqda – sud uning qamoq muddatini yana 14 kunga uzaytirish haqida qaror chiqardi. U faqat advokati bilan muloqot qilish huquqiga ega. Tergov ishlari davom etmoqda.
Mazkur shaxs 27-mart kuni Amsterdam markazidagi Dam maydoni yaqinida bir nechta pichoq bilan odamlarga hujum qilgan. Natijada besh kishi jarohatlangan, to‘rt nafari hozirgacha kasalxonada qolmoqda, ularning ahvoli barqaror deb baholanmoqda.
Hujumchining shaxsini aniqlash bir qancha vaqt davom etdi, chunki u o‘zini turli ismlar yozilgan hujjatlar bilan tanishtirgan va politsiya bilan hamkorlik qilishdan bosh tortgan. Faqat 29-mart kuni uning Donetsk viloyatidan bo‘lgan Ukraina fuqarosi ekani aniqlandi.
Aytish joiz, Donetsk viloyatida asosan rus millatiga mansub aholi yashagani bois Moskva ta’siri bo‘lgan. Rossiyaning Ukrainaga bostirib kirishda ma’lum qilgan bahonalaridan biri ham “Donetskdagi ruslarni himoya qilish” bo‘lgan.
Sal avvalroq esa Rossiya tomoni Yevropada tartibsizliklar chiqarish va milliy hamda diniy nizolar, shuningdek aksilmigrant va aksilislomiy nafrat kayfiyatlarini kuchaytirish uchun turli propaganda va provokatsiya vositalaridan foydalanishi fosh etilgan edi.
