Нидерландия Давлат прокуратураси 27 март куни Амстердамда пиёдаларга пичоқ билан ҳужум қилган 30 ёшли Украина фуқароси беш кишини ўлдиришга уринишда террорчилик мақсадига эга бўлгани учун гумонланаётганини маълум қилди.
Бироқ унинг аниқ қандай сабабларга асослангани ҳали ҳам расман маълум қилинмаган.
Ҳужум содир этилган куниёқ қўлга олинган Украина фуқароси ҳибсда қолмоқда – суд унинг қамоқ муддатини яна 14 кунга узайтириш ҳақида қарор чиқарди. У фақат адвокати билан мулоқот қилиш ҳуқуқига эга. Тергов ишлари давом этмоқда.
Мазкур шахс 27 март куни Амстердам марказидаги Дам майдони яқинида бир нечта пичоқ билан одамларга ҳужум қилган. Натижада беш киши жароҳатланган, тўрт нафари ҳозиргача касалхонада қолмоқда, уларнинг аҳволи барқарор деб баҳоланмоқда.
Ҳужумчининг шахсини аниқлаш бир қанча вақт давом этди, чунки у ўзини турли исмлар ёзилган ҳужжатлар билан таништирган ва полиция билан ҳамкорлик қилишдан бош тортган.
Фақат 29 март куни унинг Донецк вилоятидан бўлган Украина фуқароси экани аниқланди.
Айтиш жоиз, Донецк вилоятида асосан рус миллатига мансуб аҳоли яшагани боис Москва таъсири бўлган. Россиянинг Украинага бостириб киришда маълум қилган баҳоналаридан бири ҳам “Донецкдаги русларни ҳимоя қилиш” бўлган.
Сал аввалроқ эса Россия томони Европада тартибсизликлар чиқариш ва миллий ҳамда диний низолар, шунингдек аксилмигрант ва аксилисломий нафрат кайфиятларини кучайтириш учун турли пропаганда ва провокация воситаларидан фойдаланиши фош этилган эди.
