Yevropa komissiyasi rahbari — Ursula fon der Lyayen AQSH prezidenti Donald Tramp tomonidan joriy etilgan bojlarni butun dunyo bo‘ylab biznes va iste’molchilarga jiddiy zarba deb aytdi. Bu haqda u o‘zining "X" sahifasida ma’lum qildi.
"AQSH e’lon qilgan universal tariflar butun dunyodagi biznes va iste’molchilar uchun katta zarba bo‘lmoqda. Yevropa javob berishga tayyor.Biz o‘z manfaat va qadriyatlarimizni doimo himoya qilamiz", deya yozadi Ursula fon der Lyayen.
Shuningdek, u Trampning global savdo tizimidagi kamchiliklar tufayli ba’zilar “adolatsiz foyda” olayotgani haqidagi pozitsiyasiga qo‘shilishini va uni hozirgi voqelikka moslashtirish uchun sa’y-harakatlarni qabul qilishga tayyorligini aytgan. Lekin, tariflar tizimni “tuzatishga” yordam bermasligini bildirgan.
Ursula fon der Lyayen AQSH tomonidan joriy qilingan po‘lat va alyuminiy bojlari sababli Yevroittifoq javob choralarini yakunlayotganini ma’lum qilgan. Shuningdek, muzokaralar barbod bo‘lsa, Yevropa o‘z manfaatlari va bizneslarini himoya qilish uchun qo‘shimcha qarshi choralar ko‘rib chiqadi.
