Европа комиссияси раҳбари— Урсула фон дер Ляйен АҚШ президенти Доналд Трамп томонидан жорий этилган божларни бутун дунё бўйлаб бизнес ва истеъмолчиларга жиддий зарба деб айтди. Бу ҳақда у ўзининг "Х" саҳифасида маълум қилди.
"АҚШ эълон қилган универсал тарифлар бутун дунёдаги бизнес ва истеъмолчилар учун катта зарба бўлмоқда. Европа жавоб беришга тайёр.Биз ўз манфаат ва қадриятларимизни доимо ҳимоя қиламиз", дея ёзади Урсула фон дер Ляйен.
Шунингдек, у Трампнинг глобал савдо тизимидаги камчиликлар туфайли баъзилар “адолатсиз фойда” олаётгани ҳақидаги позициясига қўшилишини ва уни ҳозирги воқеликка мослаштириш учун саъй-ҳаракатларни қабул қилишга тайёрлигини айтган. Лекин, тарифлар тизимни “тузатишга” ёрдам бермаслигини билдирган.
Урсула фон дер Ляйен АҚШ томонидан жорий қилинган пўлат ва алюминий божлари сабабли Евроиттифоқ жавоб чораларини якунлаётганини маълум қилган. Шунингдек, музокаралар барбод бўлса, Европа ўз манфаатлари ва бизнесларини ҳимоя қилиш учун қўшимча қарши чоралар кўриб чиқади.
