Toshkent viloyati Chirchiq shahrida dorixona xodimini o‘ldirish bilan qo‘rqitib, pul o‘g‘irlagan erkakka sud hukmi o‘qildi. Bu haqda “Zamon” dasturida xabar berildi.
Keltirilishicha, jinoyat ishlari bo‘yicha Chirchiq shahar sudiga dorixonada dorixona xodimini o‘ldirish bilan qo‘rqitib, kassadan pul olib ketgan erkak keltirildi. Unga jinoyatining ertasi kuniyoq qamoq ehtiyot chorasi qo‘llangan.
Voqea tafsiloti: yuzini yashirgan erkak dorixonaga kirib keladi. Sotuvchini tahdid ostida ushlab turadi va kassadagi pulni olib ketadi. Dorixona sotuvchisi sudda ko‘rsatma berdi.
Uning aytishicha, hayoti xavf ostida bo‘lgani uchun qo‘rquvda unga qarshilik ko‘rsata olmagan. “Qo‘lida pichog‘i borligi uchun to‘liq qarshilik ko‘rsata olganim yo‘q. 700 ming so‘mga yaqin pulni olib, chiqib ketgan. Qarshilik qilishga harakat qildim, yuz mingcha atrofida pul tushib qoldi, shu bilan ko‘chaga chiqib, qochib ketgan”, deydi u.
Sudda sudlanuvchi aybiga iqror bo‘ldi va qilmishini o‘sha kundagi mastlik bilan izohladi: “O‘sha kuni bir o‘zim uyda o‘tirib, spirtli ichimliklar iste’mol qilgandim. Ko‘chaga qaysi maqsadda chiqqanimni bilmayman. Bu o‘sha payt sodir bo‘ldi”, deydi u.
Uning suddagi ko‘rsatmasiga ko‘ra, o‘n besh million so‘mdan ortiq kredit qarzi tushkun ahvolga solgan va tunda yashash uyiga uzoq bo‘lmagan dorixonaga bostirib kirgan.
U Jinoyat kodeksining 164-moddasining ikkinchi qismi “a” bandi bilan aybdor deb topildi va 8 yil muddatga ozodlikdan mahrum qilish jazosi tayinlandi.
