Тошкент вилояти Чирчиқ шаҳрида дорихона ходимини ўлдириш билан қўрқитиб, пул ўғирлаган эркакка суд ҳукми ўқилди. Бу ҳақда “Замон” дастурида хабар берилди.
Келтирилишича, жиноят ишлари бўйича Чирчиқ шаҳар судига дорихонада дорихона ходимини ўлдириш билан қўрқитиб, кассадан пул олиб кетган эркак келтирилди. Унга жиноятининг эртаси куниёқ қамоқ эҳтиёт чораси қўлланган.
Воқеа тафсилоти: юзини яширган эркак дорихонага кириб келади. Сотувчини таҳдид остида ушлаб туради ва кассадаги пулни олиб кетади. Дорихона сотувчиси судда кўрсатма берди.
Унинг айтишича, ҳаёти хавф остида бўлгани учун қўрқувда унга қаршилик кўрсата олмаган. “Қўлида пичоғи борлиги учун тўлиқ қаршилик кўрсата олганим йўқ. 700 минг сўмга яқин пулни олиб, чиқиб кетган. Қаршилик қилишга ҳаракат қилдим, юз мингча атрофида пул тушиб қолди, шу билан кўчага чиқиб, қочиб кетган”, дейди у.
Судда судланувчи айбига иқрор бўлди ва қилмишини ўша кундаги мастлик билан изоҳлади: “Ўша куни бир ўзим уйда ўтириб, спиртли ичимликлар истеъмол қилгандим. Кўчага қайси мақсадда чиққанимни билмайман. Бу ўша пайт содир бўлди”, дейди у.
Унинг суддаги кўрсатмасига кўра, ўн беш миллион сўмдан ортиқ кредит қарзи тушкун аҳволга солган ва тунда яшаш уйига узоқ бўлмаган дорихонага бостириб кирган.
У Жиноят кодексининг 164-моддасининг иккинчи қисми “а” банди билан айбдор деб топилди ва 8 йил муддатга озодликдан маҳрум қилиш жазоси тайинланди.
