1 haftada energiya resurslarini o‘g‘irlash bilan bog‘liq 2700 dan ortiq holat aniqlandi. Bu haqda DXX ma’lum qildi.
Qayd etilishicha, 2025-yilning 1–7-aprel kunlari Davlat xavfsizlik xizmati, Ichki ishlar vazirligi, Bosh prokuratura va “O‘zenergoinspeksiya” xodimlari hamkorligida reyd tadbirlari o‘tkazilgan.
Mazkur tadbirlar davomida energiya resurslaridan noqonuniy foydalanish bo‘yicha 2776 ta holat fosh etilgan. Aniqlangan holatlardan 1807 tasi elektr energiyasi, 969 tasi esa tabiiy gazdan noqonuniy foydalanishga oid bo‘lib, davlatga yetkazilgan umumiy zarar 19,5 milliard so‘mdan oshgan.
Tergovga qadar o‘tkazilgan surishtiruvlar asosida 39 ta jinoyat ishi qo‘zg‘atilgan, 263 ta holatda esa ma’muriy choralar belgilangan.
Shu bilan birga, ko‘rilgan chora-tadbirlar natijasida 6,8 milliard so‘m miqdoridagi zarar davlat foydasiga undirilgan.
