Toshkent shahri Shayxontohur tumanida noma’lum shaxs odamlarga pichoq bilan tahdid qildi. Bu haqda poytaxt IIBB axborot xizmati ma’lum qildi.
Qayd etilishicha, Qo‘riqlash boshqarmasiga 18-aprel kuni soat 19:40 atrofida Sebzor ko‘chasidagi avtoturargohlardan biridagi “tashvish tugmasi” bosilgani haqida xabar kelib tushgan.
67 yoshli X.S. mast holatda avtoturargoh qorovuli va boshqa fuqarolarni oshxona pichog‘i bilan qo‘rqitib, jamoat tartibini buzgan. So‘ng voqea joyidan qochib, ko‘p qavatli uylardan biriga kirib ketgan.
Ijtimoiy tarmoqlarda tarqalgan videoda erkak liftda yolg‘iz bolani qo‘rqitib, unga bir necha marta tarsaki tushirgani ko‘rinadi. Yana birida esa boshqa bolalar undan qochib, ko‘p qavatli uyga yashirinadi.
Boshqarmaga ko‘ra, ko‘rilgan tezkor chora-tadbirlar natijasida u ushlanib, yaqin oradagi IIBga olib borilgan. Fuqaro pichoq bilan hech kimga tan jarohati yetkazmagan.
Holat yuzasidan X.S.ga nisbatan Ma’muriy javobgarlik to‘g‘risidagi kodeksning 183-moddasi (Mayda bezorilik), 194-moddasi (Ichki ishlar organlari xodimining qonuniy talablarini bajarmaslik) va 185−2-moddasi (Sovuq qurolni yoki sovuq qurol sifatida foydalanilishi mumkin bo‘lgan ashyolarni olib yurish) bilan ma’muriy bayonnoma rasmiylashtirilgan.
Jinoyat ishlari bo‘yicha Shayxontohur tumani sudi ushbu shaxsga nisbatan 10 sutka ma’muriy qamoq jazosi tayinlangan,— deyiladi xabarda.
