May oyi oxirida Germaniya, Niderlandiya, Fransiya, Daniya, Buyuk Britaniya, Kanada va AQSH huquq-tartibot organlari Yevropol bilan hamkorlikda “Endgame” nomli maxsus operatsiyani o‘tkazdi.
Operatsiya natijalari 3 iyun kuni Germaniya ichki ishlar vaziri Aleksandr Dobrindt va Federal jinoyatchilik idorasi rahbari Xolger Myun tomonidan e’lon qilindi.
Myunning so‘zlariga ko‘ra, Germaniya tobora ko‘proq “prorossiy” deb baholangan xakerlar hujumiga uchramoqda. Dobrindt buni Germaniyaning Ukrainani qo‘llab-quvvatlayotgani bilan izohladi.
“Endgame” operatsiyasi davomida 300 ta server faoliyati to‘xtatildi, shundan 50 tasi Germaniyada joylashgan. 3,5 million yevroga teng kriptovalyuta musodara qilindi. 37 nafar jinoyatchining shaxsi aniqlangan, 20 nafari ustidan xalqaro qidiruv e’lon qilingan. Biroq ular Rossiyada bo‘lgani bois qo‘lga olinmagan.
DanaBot, Bumblebee, Latrodectus, Qakbot, HijackLoader, Warmcookie va Trickbot kabi zararli dasturiy ta’minotlar va bot tarmoqlari ishi to‘xtatildi.
