Май ойи охирида Германия, Нидерландия, Франция, Дания, Буюк Британия, Канада ва АҚШ ҳуқуқ-тартибот органлари Европол билан ҳамкорликда “Эндгаме” номли махсус операцияни ўтказди.
Операция натижалари 3 июнь куни Германия ички ишлар вазири Александр Добриндт ва Федерал жиноятчилик идораси раҳбари Холгер Мюн томонидан эълон қилинди.
Мюннинг сўзларига кўра, Германия тобора кўпроқ “пророссий” деб баҳоланган хакерлар ҳужумига учрамоқда. Добриндт буни Германиянинг Украинани қўллаб-қувватлаётгани билан изоҳлади.
“Эндгаме” операцияси давомида 300 та сервер фаолияти тўхтатилди, шундан 50 таси Германияда жойлашган. 3,5 миллион еврога тенг криптовалюта мусодара қилинди. 37 нафар жиноятчининг шахси аниқланган, 20 нафари устидан халқаро қидирув эълон қилинган. Бироқ улар Россияда бўлгани боис қўлга олинмаган.
DanaBot, Bumblebee, Latrodectus, Qakbot, HijackLoader, Warmcookie ва Trickbot каби зарарли дастурий таъминотлар ва бот тармоқлари иши тўхтатилди.
