Andijon viloyatining Andijon tumanida yashovchi shaxs yashash xonadonida tavakkalchilikka asoslangan noqonuniy qimor o‘yini tashkil qilgani aniqlandi. Bu haqda viloyat Ichki ishlar boshqarmasi xabar berdi.
Ma’lum qilinishicha, “Xavfsiz va sog‘lom yurt” tezkor profilaktik tadbiri doirasida Andijon viloyati Ichki ishlar boshqarmasi Uyushgan jinoyatchilikka qarshi kurashish bo‘limi xodimlari tomonidan olib borilgan tezkor tadbirlar davomida Andijon tumanida yashovchi shaxs yashash xonadonida tavakkalchilikka asoslangan noqonuniy qimor o‘yini tashkil qilgani fosh etilgan.
Voqea joyidan 4 mln 535 ming so‘m pul hamda 300 AQSH dollari, 4 dona hayvon suyagidan yasalgan oshiq, shuningdek, o‘yin tashkillashtirilgan xonadon egasidan 550 ming so‘m cho‘tal puli ashyoviy dalil sifatida olib qo‘yilgan.
Bildirilishicha, hozirda mazkur holat yuzasidan Jinoyat kodeksining 278-moddasi (qimor va tavakkalchilikka asoslangan boshqa o‘yinlarni tashkil etish hamda o‘tkazish) bilan jinoyat ishi qo‘zg‘atilib, tergov harakatlari olib borilmoqda.
