O‘zbekistonda 40-50 yildan beri harakatlanib kelayotgan avtomashinalar tez orada iste’moldan chiqarilishi mumkin. Bu haqda “Milliy tiklanish” demokratik partiyasi fraksiyasi rahbari Alisher Qodirov o‘z sahifasida yozdi.
Uning aytishicha, 9 iyul kuni prezident raisligida o‘tgan videoselektor yig‘ilishida bir qator muhim taklif va tavsiyalar muhokama qilingan. Shular qatorida, yoshi 40-50 yilga yetgan avtomobillarni bosqichma-bosqich harakatdan chiqarish masalasi ham tilga olingan.
“Bu juda to‘g‘ri taklif. Hatto bu cheklovni 25-30 yilga tushirish ham noto‘g‘ri bo‘lmaydi, deb o‘ylayman. Faqat mashinani almashtirish uchun qulay sharoitlar yaratilishi kerak”, — deydi deputat.
Yig‘ilishda, shuningdek, davlat xodimlarining ish joyi oldida shaxsiy avtomashinalarini noto‘g‘ri joylashtirgani uchun jazoga tortilishi belgilandi. Qodirov bu borada “qonun hammaga barobar bo‘lishi kerak”ligini urg‘ulab o‘tdi.
Videoselektorda e’lon qilingan boshqa choralar:
— “Surunkali qoidabuzarlar” dasturi ishga tushadi;
— Qizil chiroqda 2-marta o‘tish yoki 5 marta tezlikni oshirish — 1 yilgacha chegirmasiz jarima;
— Tezlik cheklovlari joy va zaruratga qarab belgilanishi kerak.
Qodirov magistral yo‘llarda ba’zida 130 km/soat tezlikda harakat qilishga ruxsat berish zarurligini aytgan. Shu bilan birga, qasddan qoidabuzarlarga “ayovsiz jarima” qo‘llashni ma’qullagan.
Ichki ishlar xodimlarini tayyorlash masalasi ham muhokama markazida bo‘ldi. Deputat bu boradagi islohotlarni og‘riqli, ammo zarur deb atadi.
“Formadagi odam jamiyatga faxr bo‘lishi kerak, tanish-bilish emas, bilimli, vatanparvar kadrlarga ehtiyoj katta”, — deya ta’kidladi u.
Yaqin kelajakda qonunchilikka tegishli o‘zgartirishlar kiritilishi, jumladan, 2030 yilgacha Toshkent, Nukus va viloyat markazlarida “Yevro-5” talablariga javob bermaydigan avtomobillarning harakati bosqichma-bosqich cheklanishi rejalashtirilmoqda.
