Prezident Shavkat Mirziyoyev raisligida bo‘lib o‘tgan yig‘ilishda oliy ta’limda moliyaviy mustaqillik, kadrlar tayyorlash va bitiruvchilarni ish bilan ta’minlash bo‘yicha dolzarb masalalar muhokama qilindi.
Ma’lum qilinishicha, 40 ta oliygohga moliyaviy mustaqillik berilgan va bu natija bera boshlagan. Biroq muhandislik, STEM, qishloq xo‘jaligi kabi sohalardagi oliygohlar hali daromad topish va talabalarni jalb etish borasida orqada qolmoqda.
Prezident “tarmoq–korxona–oliygoh” tizimini tezroq joriy qilish zarurligini ta’kidladi. Allaqachon 25 ta muhandislik oliygohida 438 ta ishlab chiqarish kafedralari tashkil etilgan. Masalan, Buxoro texnika universiteti 10 ta yirik korxonada 20 ta kafedra ochgan.
Yig‘ilishda, shuningdek, qiymati 1 mln dollardan oshgan, 50 dan ortiq ish o‘rni yaratuvchi har bir loyiha uchun zarur kadrlar ehtiyoji aniqlanib, oliygohlarga aniq buyurtma berilishi belgilandi.
Unga ko‘ra:
Talabalar buyurtmaga asosan qo‘shimcha modullar orqali tayyorlanadi;
Bu modullar uchun kredit ballari beriladi;
Talaba 2-kursdan boshlab bilimini investor baholaydi;
Diplom ishi investor ehtiyojiga mos mavzuda himoya qilinadi;
Bitiruvchini ishga olish – kafolatli bo‘ladi.
Yig‘ilishda byurokratik to‘siqlar sabab xususiy sektor bo‘sh ish o‘rinlarini yashirayotgani tanqid qilindi. Shuning uchun yangi platforma orqali xususiy sektorga qulay tizim yaratiladi.
Endilikda:
Tadbirkor bo‘sh ish o‘rni va mutaxassislikni platformaga joylaydi;
Oliygohlar “karera markazi” orqali bitiruvchini korxona bilan bog‘laydi;
Ishga olgan tadbirkorga reytingda ball qo‘shiladi;
Bitiruvchisining yarmidan ko‘pini ishga joylashtirgan “karera markazi”ga 500 mln so‘m mukofot beriladi.
