Президент Шавкат Мирзиёев раислигида бўлиб ўтган йиғилишда олий таълимда молиявий мустақиллик, кадрлар тайёрлаш ва битирувчиларни иш билан таъминлаш бўйича долзарб масалалар муҳокама қилинди.
Маълум қилинишича, 40 та олийгоҳга молиявий мустақиллик берилган ва бу натижа бера бошлаган. Бироқ муҳандислик, СТЕМ, қишлоқ хўжалиги каби соҳалардаги олийгоҳлар ҳали даромад топиш ва талабаларни жалб этиш борасида орқада қолмоқда.
Президент “тармоқ–корхона–олийгоҳ” тизимини тезроқ жорий қилиш зарурлигини таъкидлади. Аллақачон 25 та муҳандислик олийгоҳида 438 та ишлаб чиқариш кафедралари ташкил этилган. Масалан, Бухоро техника университети 10 та йирик корхонада 20 та кафедра очган.
Йиғилишда, шунингдек, қиймати 1 млн доллардан ошган, 50 дан ортиқ иш ўрни яратувчи ҳар бир лойиҳа учун зарур кадрлар эҳтиёжи аниқланиб, олийгоҳларга аниқ буюртма берилиши белгиланди.
Унга кўра:
Талабалар буюртмага асосан қўшимча модуллар орқали тайёрланади;
Бу модуллар учун кредит баллари берилади;
Талаба 2-курсдан бошлаб билимини инвестор баҳолайди;
Диплом иши инвестор эҳтиёжига мос мавзуда ҳимоя қилинади;
Битирувчини ишга олиш – кафолатли бўлади.
Йиғилишда бюрократик тўсиқлар сабаб хусусий сектор бўш иш ўринларини яшираётгани танқид қилинди. Шунинг учун янги платформа орқали хусусий секторга қулай тизим яратилади.
Эндиликда:
Тадбиркор бўш иш ўрни ва мутахассисликни платформага жойлайди;
Олийгоҳлар “карера маркази” орқали битирувчини корхона билан боғлайди;
Ишга олган тадбиркорга рейтингда балл қўшилади;
Битирувчисининг ярмидан кўпини ишга жойлаштирган “карера маркази”га 500 млн сўм мукофот берилади.
