Samarqand viloyatida yashab kelgan va oilaviy nizolardan uzoqlashishni istagan yosh ona Nasiba (shartli ism) xorijda vaʼda qilingan yuqori daromadli ishga aldanish ogʻir vaziyatga tushib qoldi. Bu haqda Bosh konsulxona xabar bermoqda.
Unga koʻra, ijtimoiy tarmoqlarda oʻzini muvaffaqiyatli tadbirkor sifatida tanitgan Istanbulda yashovchi Kemal (shartli ism) Nasibaga malaka va til bilimi talab qilinmaydigan, yuqori maoshli ishni vaʼda qilib, uni ishchi vizasisiz Turkiyaga olib kelgan. Ammo keyinchaqil yoʻl xarajatlari uchun qarzdorligini bildirgan “saxovatli tadbirkor” uning pasportini olib qoʻydi va ogʻir sharoitlarda ishlashga majburlamoqchi boʻlgan.
Mazkur holat yuzasidan konsulxonaga kelib tushgan murojaat asosida diplomatik vakolatxonamiz hamda Migratsiya agentligining Turkiyadagi vakilligi tomonidan tezkor choralar koʻrildi. Olib borilgan tadbirlar natijasida fuqoromiz sogʻ-omon holida Vatanimizga qaytarildi. Shu bilan birga, yolgʻon vaʼdalar berib, fuqoromizni aldashga uringan shaxsning harakatlari yuzasidan Turkiya huquqni muhofaza qiluvchi idoralariga tegishli maʼlumot taqdim etildi, deyiladi xabarda.
