AQSh prezidenti Donald Tramp Isroil va Livan o‘rtasidagi o‘t ochishni to‘xtatish rejimi yana uch haftaga uzaytirilishini ma’lum qildi. Uning so‘zlariga ko‘ra, bu qaror Vashingtonda bo‘lib o‘tgan samarali muzokaralar natijasida qabul qilingan.
Tramp yaqin vaqtda Isroil bosh vaziri Binyamin Netanyaxu va Livan prezidenti Jozef Aun bilan uchrashuv o‘tkazishni rejalashtirayotganini aytdi. U mazkur muloqotni “tarixiy” deb atadi.
Oq uydagi uchrashuvda AQSh vitse-prezidenti Jey Di Vens, davlat kotibi Marko Rubio hamda AQShning mintaqadagi elchilari ishtirok etgan. Muzokaralar yakunida Rubio Isroil va Livanning “bir xil terror tashkiloti qurboni” deb atab, “Hizbullah”ni nazarda tutgan.
Shu bilan birga, Tramp agar Isroilga qarshi hujumlar davom etsa, mamalakat o‘zini himoya qilishga majbur bo‘lishini ta’kidladi. So‘nggi ma’lumotlarga ko‘ra, Isroil mudofaa kuchlari “Hizbullah” tomonidan uchirilgan raketalarni tutib qolgan.
