AQShning Viskonsin shtatida yashovchi 45 yoshli erkak o‘zini halok bo‘ldi deb ko‘rsatib, O‘zbekistonlik ayolning yoniga borish uchun mohirona reja tuzgan. CNN yozishicha, erkak 2024 yil 12 avgust kuni xotiniga Grin-Leyk ko‘lida kayakda sayr qilishini aytgan va o‘sha kundan boshlab bedarak yo‘qolgan. Dastlab bu holat cho‘kib ketganlik deb baholangan.
Ammo 58 kunlik qidiruvdan natija bo‘lmagach, tergov kengaytirildi. So‘nggi ma’lumotlarga ko‘ra, erkak bedarak yo‘qolishidan uch oy oldin yangi pasport olgan va o‘zini halok bo‘lgandek ko‘rsatgan. U avvaldan olib chiqqan rezina qayiqda sohilga chiqib, hujjatlarini ko‘lga tashlab ketgan.
Keyin u Torontoga, u yerdan Parijga, undan so‘ng Osiyodagi davlat orqali Gruziyaga yo‘l olgan. O‘zbekistonlik ayol uni kutib olgan va ular dastlab mehmonxonada yashagan. Erkak keyinchalik Gruziyaga joylashib olgan.
U noyabr oyida aniqlandi, dekabrda AQShga qaytarilgan. O‘zini halok bo‘lgan deb ko‘rsatib, tergovga to‘sqinlik qilganlikda ayblangan erkakka sud tomonidan 89 kunlik qamoq jazosi tayinlandi. Bundan tashqari, u qidiruv ishlari uchun sarflangan 30 ming dollarni ham to‘lashi belgilandi.
Ma’lumotlarga ko‘ra, erkak uch farzandi va 22 yil birga yashagan turmush o‘rtog‘i bilan usbu voqealardan so‘ng to‘rt oy ichida rasmiy ajrashgan.
