АҚШнинг Висконсин штатида яшовчи 45 ёшли эркак ўзини ҳалок бўлди деб кўрсатиб, Ўзбекистонлик аёлнинг ёнига бориш учун моҳирона режа тузган. CNN ёзишича, эркак 2024 йил 12 август куни хотинига Грин-Лейк кўлида каякда сайр қилишини айтган ва ўша кундан бошлаб бедарак йўқолган. Дастлаб бу ҳолат чўкиб кетганлик деб баҳоланган.
Аммо 58 кунлик қидирувдан натижа бўлмагач, тергов кенгайтирилди. Сўнгги маълумотларга кўра, эркак бедарак йўқолишидан уч ой олдин янги паспорт олган ва ўзини ҳалок бўлгандек кўрсатган. У аввалдан олиб чиққан резина қайиқда соҳилга чиқиб, ҳужжатларини кўлга ташлаб кетган.
Кейин у Торонтога, у ердан Парижга, ундан сўнг Осиёдаги давлат орқали Грузияга йўл олган. Ўзбекистонлик аёл уни кутиб олган ва улар дастлаб меҳмонхонада яшаган. Эркак кейинчалик Грузияга жойлашиб олган.
У ноябрь ойида аниқланиб, декабрда АҚШга қайтарилган. Ўзини ҳалок бўлган деб кўрсатиб, терговга тўсқинлик қилганликда айбланган эркакка суд томонидан 89 кунлик қамоқ жазоси тайинланди. Бундан ташқари, у қидирув ишлари учун сарфланган 30 минг долларни ҳам тўлаши белгиланди.
Маълумотларга кўра, эркак уч фарзанди ва 22 йил бирга яшаган турмуш ўртоғи билан ушбу воқеалардан сўнг тўрт ой ичида расмий ажрашган.
