Shavkat Mirziyoyev Islom sivilizatsiyasi markazida olib borilayotgan yakuniy ishlar bilan tanishdi

29 avgust kuni Prezident Shavkat Mirziyoyev qurilishi yakuniy bosqichga kirgan Islom tsivilizatsiyasi markaziga tashrif buyurdi. Ushbu noyob loyiha 2017 yil 23 iyundagi Prezident qarori asosida boshlangan va 2018 yilgi Ramazon hayiti kuni poydevoriga qoʻyilgan edi. Inshoot milliy meʼmoriy anʼanalar asosida, baland gumbaz va peshtoqlar, betakror naqshlar uygʻunligida bunyod etilmoqda. Majmua markazida 65 metrli gumbaz, toʻrt tomonida esa 34 metrli peshtoqlar qurilgan. Markazning eng muhim qismi – Qurʼoni karim zalida qadimiy Usmon Mus’hafi, shuningdek, turli sulolalar davrida bitilgan Qurʼon nusxalari va tarjimalari joylashtiriladi. Zalda soʻnggi pardozlash ishlari koʻzdan kechirilib, Prezident tomonidan qator tavsiyalar berildi. Majmuada 460 oʻrinli anjumanlar zali, „Birinchi“ va „Ikkinchi Renessans“, „Islomdan avvalgi tsivilizatsiyalar“, „Yangi Oʻzbekiston – yangi Renessans“ kabi boʻlimlar tashkil etilmoqda. Ular orqali xalqimiz tarixidagi ulugʻ allomalar, mutafakkirlar va ulamolarning ilmiy-maʼrifiy merosi multimedia vositalari yordamida namoyon etiladi. Prezident markazda faoliyat yuritadigan ilmiy-tadqiqot yoʻnalishlarini belgilab, xalqaro islomshunoslik tashkilotlari bilan hamkorlikni yoʻlga qoʻyish, zamonaviy tahdidlarga ilmiy yechimlar topish zarurligini taʼkidladi. Shuningdek, davlat rahbari markaz atrofida barpo etilgan savdo va xizmat koʻrsatish obyektlari bilan ham tanishib, turizmni rivojlantirishdagi ahamiyatiga alohida eʼtibor qaratdi. „Bu erga keladigan mehmonlar xalqimizning boy tarixi, ajdodlarimiz bilim va tafakkuriga tan beradi“, – dedi Shavkat Mirziyoyev.