29 август куни Президент Шавкат Мирзиёев қурилиши якуний босқичга кирган Ислом цивилизацияси марказига ташриф буюрди. Ушбу ноёб лойиҳа 2017 йил 23 июндаги Президент қарори асосида бошланган ва 2018 йилги Рамазон ҳайити куни пойдеворига қўйилган эди.
Иншоот миллий меъморий анъаналар асосида, баланд гумбаз ва пештоқлар, бетакрор нақшлар уйғунлигида бунёд этилмоқда. Мажмуа марказида 65 метрли гумбаз, тўрт томонида эса 34 метрли пештоқлар қурилган.
Марказнинг энг муҳим қисми – Қуръони карим залида қадимий Усмон Мусҳафи, шунингдек, турли сулолалар даврида битилган Қуръон нусхалари ва таржималари жойлаштирилади. Залда сўнгги пардозлаш ишлари кўздан кечирилиб, Президент томонидан қатор тавсиялар берилди.
Мажмуада 460 ўринли анжуманлар зали, “Биринчи” ва “Иккинчи Ренессанс”, “Исломдан аввалги цивилизациялар”, “Янги Ўзбекистон – янги Ренессанс” каби бўлимлар ташкил этилмоқда. Улар орқали халқимиз тарихидаги улуғ алломалар, мутафаккирлар ва уламоларнинг илмий-маърифий мероси мультимедиа воситалари ёрдамида намоён этилади.
Президент марказда фаолият юритадиган илмий-тадқиқот йўналишларини белгилаб, халқаро исломшунослик ташкилотлари билан ҳамкорликни йўлга қўйиш, замонавий таҳдидларга илмий ечимлар топиш зарурлигини таъкидлади.
Шунингдек, давлат раҳбари марказ атрофида барпо этилган савдо ва хизмат кўрсатиш объектлари билан ҳам танишиб, туризмни ривожлантиришдаги аҳамиятига алоҳида эътибор қаратди.
“Бу ерга келадиган меҳмонлар халқимизнинг бой тарихи, аждодларимиз билим ва тафаккурига тан беради”, – деди Шавкат Мирзиёев.
