Rossiyaning Krasnoyarsk viloyatida o‘zbekistonlik xonanda Jaloliddin Ahmadaliyev kontserti paytida huquqni muhofaza qiluvchi organlar tomonidan o‘tkazilgan reyd jamoatchilikda keng muhokamalarga sabab bo‘ldi. Unga ko‘ra, “Korona” ziyofat zalidagi tadbir paytida yuzlab fuqarolar hujjat tekshiruvidan o‘tkazilgan.
Holat yuzasidan O‘zbekiston Vazirlar Mahkamasi huzuridagi Migratsiya agentligi rasmiy munosabat bildirdi. Qayd etilishicha, agentlikning Rossiyadagi vakolatxonasi tomonidan fuqarolarning huquq va manfaatlarini himoya qilish maqsadida litsenziyaga ega advokat voqea joyiga yuborilgan.
“Ayni paytda mazkur holat Rossiya Federatsiyasining amaldagi qonunchiligi doirasida o‘rganilmokda”, — deyiladi agentlik bayonotida.
Ma’lumot uchun, mazkur reyd kontsert vaqtida amalga oshirilgan bo‘lib, uning sabablari hozircha rasman oshkor etilmagan. Jamoatchilik Rossiyadagi o‘zbekistonlik fuqarolarga bunday munosabatni keskin tanqid qilmokda.
