Россиянинг Красноярск ўлкасида ўзбекистонлик хонанда Жалолиддин Аҳмадалиев концерти пайтида ҳуқуқни муҳофаза қилувчи органлар томонидан ўтказилган рейд жамоатчиликда кенг муҳокамаларга сабаб бўлди. Унга кўра, “Корона” зиёфат залидаги тадбир пайтида юзлаб фуқаролар ҳужжат текширувидан ўтказилган.
Ҳолат юзасидан Ўзбекистон Вазирлар Маҳкамаси ҳузуридаги Миграция агентлиги расмий муносабат билдирди. Қайд этилишича, агентликнинг Россиядаги ваколатхонаси томонидан фуқароларнинг ҳуқуқ ва манфаатларини ҳимоя қилиш мақсадида лицензияга эга адвокат воқеа жойига юборилган.
“Айни пайтда мазкур ҳолат Россия Федерациясининг амалдаги қонунчилиги доирасида ўрганилмоқда”, — дейилади агентлик баёнотида.
Маълумот учун, мазкур рейд концерт вақтида амалга оширилган бўлиб, унинг сабаблари ҳозирча расман ошкор этилмаган. Жамоатчилик Россиядаги ўзбекистонлик фуқароларга бундай муносабатни кескин танқид қилмоқда.
