DXX axborot xizmati bergan xabarga ko‘ra, Davlat xavfsizlik xizmati Chegara qo‘shinlari harbiy xizmatchilari tomonidan tovar-moddiy boyliklarning noqonuniy aylanasiga qarshi kurashish yo‘nalishida bojxona idoralari xodimlari bilan hamkorlikda tezkor tadbir o‘tkazilgan.
Xususan, “Volgograd - Toshkent” yo‘nalishida harakatlanib kelayotgan poezd “Qoraqalpog‘iston - temir yo‘l” xalqaro o‘tkazish punktida tekshirilgan.
Natijada 7-vagon kuzatuvchisi bo‘lgan – Samarqand shahrida yashovchi, 1981 y.t. shaxs tomonidan vagonning havo aylantirish shaxtasiga yashirib qo‘yilgan, taxminan 913 mln so‘mlik 30 turdagi 2742 dona stomatologik buyumlar, implantlar va uskunalar borligi aniqlanib, rasmiylashtirib olingan.
Shuningdek, poezdning 12-vagonida ham shunga o‘xshash holat aniqdanib, vagon kuzatuvchisi bo‘lgan – Toshkent shahrida yashovchi, 1976 y.t. fuqaro tomonidan bojxona ko‘rigidan yashirin ravishda olib kiritilgan, taxminan 1,5 mlrd so‘mlik 12 turdagi jami 894 dona dori vositalari hamda tibbiy anjomlar ashyoviy dalil sifatida olingan.
Ma’lum bo‘lishicha, vagon kuzatuvchilari moddiy manfaatdorlik evaziga tibbiy buyum va dori vositalarini Toshkent shahriga yetkazib berishlari kerak bo‘lgan.
Hozirda surishtiruv ishlari olib borilmogda, deyiladi xabarda.
