Diqqat bilan tinglang — quyidagi voqealar mamlakatiymizda korrupsiyaga qarshi kurash qanchalarik keskin va izchil davom etayotganini yaqqol ko‘rsatadi.
Jizzax — gaz ta’minoti tizimidagi pora
Jizzax shahrida “Hududgaz Jizzax” filiali yetakchi mutaxassisi tuzilgan dalolatnomani bekor qilish va tergovgacha tekshiruv bo‘yicha jinoyat ishi qo‘zgatilmasligini “hal qilish” evaziga MChJ vakilidan 6 ming dollar talab qilgan. Mutaxassis kelishilgan pulni filial binosi oldida olayotganda ashyoviy dalillar bilan ushlangan.
Jizzax viloyati — FVB boshlig‘i
Tuman Favqulodda vaziyatlar bo‘limi boshlig‘i qurilish loyihasini tasdiqlash uchun avval 200 dollar, keyin xususiy maktab loyihasi uchun 6 million so‘m pora olayotganda qo‘lga olingan.
Samarqand — tibbiyot birlashmasidagi kamomad
Urgut tumanida tibbiyot birlashmasidagi 61 million so‘mlik kamomad bo‘yicha ish qo‘zgatilgan. Tekshiruvda hokim yordamchisi gumonlanuvchiga yordam berishni va’da qilib 2 500 dollar olayotganda ushlanadi. Pulni olishda ishtirok etgan advokat ham tezkor tadbirda qo‘lga olingan.
Toshkent viloyati — “Yagona buyurtmachi xizmati”dagi pora
Bekobod tumanidagi yangi MTT qurilishida 176 million so‘m kamomad aniqlangach, bosh yuriskonsult tekshiruv natijasini “ijobiy hal qilib berish” uchun MChJ rahbaridan 8 400 dollar talab qilgan. U ham tezkor tadbirda ushlangan.
Sirdaryo — Xovos tumanida ikki nafar IIB xodimi
Bog‘dorchilik MChJiga oid o‘g‘irlik bo‘yicha 4 nafardan fuqaro majburan olib ketilib, ulardan ishni yopish evaziga navbatma-navbat 55 million so‘m, 24 million so‘m va qo‘shimcha 11 million so‘m talab qilingan.
DHX va prokuratura xodimlari tomonidan o‘tkazilgan operatsiyada ikki nafar xodim 11 million so‘mni olayotganda qo‘lga olingan.
Toshkent shahri — soliq bosh inspektori
To‘qimachilik MChJiga qo‘shimcha 8,7 milliard so‘m soliq hisoblangach, bosh inspektor uni bekor qilib berish uchun 5 ming dollar olgan. Ammo bajarmay, pulni qaytarayotganida DHX tomonidan ushlangan.
Sud tizimi — hakamlik sudi sudyasi
Sudya ikki fuqaroni Janubiy Koreyaga mavsumiy ishchi sifatida yuborish evaziga 15 ming dollar, shundan 4 100 dollarini avans olgan. Va’dasini bajara olmagach, pulning bir qismini qaytarayotganda qo‘lga olingan.
Toshkent viloyati va Toshkent shahri — yer savdosi bilan bog‘liq pora holatlari
1-holat: Bir guruh shaxslar tadbirkordan yer ajratish va kommunikatsiya ruxsatlari uchun 7,3 million dollar talab qilgan. Tezkor tadbirda ular 160 ming dollar olayotganida ushlangan.
2-holat: Yashnobod tumani hokimligi bosh yuriskonsulti sud qarori bo‘yicha apellyatsiya bermaslik uchun 5 ming dollar so‘ragan. U 4 ming dollar olayotganda qo‘lga tushgan.
Nurafshon shahri — hokim yordamchisi
U fuqaroni Ekologiya qo‘mitasiga ishga joylab qo‘yish evaziga 2 ming dollar talab qilgan. Pulni tanishlari orqali olayotganda DHX tomonidan ushlangan. U ilgari ham bir necha marta sudlangan.
Ushbu jinoyatlarni sodir etgan amaldorlarning barchasiga nisbatan jinoyat ishlari qo‘zgatilib, tegishli moddalar asosida jinoyiy javobgarlik choralari qo‘llangan.
