9 yanvar kuni Rossiya Qurolli kuchlari Ukrainaning Lvov shahriga "Oreshnik" raketasi yordamida zarba bergan. Bu haqda Rossiya Mudofaa vazirligi xabar qildi.
Qayd etilishicha, mazkur hujum 2025 yil 29 dekabr kuni Rossiya Prezidenti Vladimir Putinning Novgorod viloyatidagi qarorgohiga uyushtirilgan hujumga javob sifatida amalga oshirilgan.
Lvov shahar meri Andrey Sadoviy bu shaharga birinchi bor shunday turdagi raketa bilan zarba berilganini ma'lum qilgan. Uning aytishicha, raketa soatiga taxminan 13 ming kilometr tezlikda ballistik traektoriya bo'ylab harakatlangan.
Shuningdek, Ukraina Harbiy-havo kuchlari 8 yanvar kuni kechqurun butun mamlakat bo'ylab raketa xavfi e'lon qilinganini bildirgan. Bu Moskva vaqti bilan 9 yanvar soat 00:30 da Astraxan viloyatidagi Kapustin Yar poligonidan ballistik raketa qo'llanilishi ehtimoli bilan bog'liq bo'lgan.
Lvov viloyati harbiy ma'muriyati rahbari Maksim Kozitskiyning ma'lum qilishicha, zarba muhim infratuzilma ob'ektlariga qaratilgan bo'lishi mumkin. Xususan, "Striy" gaz koni va gaz ombori nishonga olingani taxmin qilinmoqda.
Ukraina Tashqi ishlar vaziri Andrey Sibiga esa BMT Xavfsizlik Kengashining shoshilinch yig'ilishini chaqirish, shuningdek, Ukraina–NATO Kengashi va Evropa tashkilotlari doirasida qo'shma choralar ko'rishga chaqirgan.
Eslatib o'tamiz, Rossiya avvalroq ham — 2024 yil 20 noyabrdan 21 noyabrgacha o'tar kechasi Dnepr shahriga zarba berishda "Oreshnik" raketasidan foydalangan edi. O'shanda Vladimir Putin uni yadroviy bo'lmagan gipertovushli ballistik raketa deb ta'riflagan.
