9 январь куни Россия Қуролли кучлари Украинанинг Львов шаҳрига “Орешник” ракетаси ёрдамида зарба берган. Бу ҳақда Россия Мудофаа вазирлиги хабар қилди.
Қайд этилишича, мазкур ҳужум 2025 йил 29 декабрь куни Россия Президенти Владимир Путиннинг Новгород вилоятидаги қароргоҳига уюштирилган ҳужумга жавоб сифатида амалга оширилган.
Львов шаҳар мэри Андрей Садовий бу шаҳарга биринчи бор шундай турдаги ракета билан зарба берилганини маълум қилган. Унинг айтишича, ракета соатига тахминан 13 минг километр тезликда баллистик траектория бўйлаб ҳаракатланган.
Шунингдек, Украина Ҳарбий-ҳаво кучлари 8 январь куни кечқурун бутун мамлакат бўйлаб ракета хавфи эълон қилинганини билдирган. Бу Москва вақти билан 9 январь соат 00:30 да Астрахан вилоятидаги Капустин Яр полигонидан баллистик ракета қўлланилиши эҳтимоли билан боғлиқ бўлган.
Львов вилояти ҳарбий маъмурияти раҳбари Максим Козицкийнинг маълум қилишича, зарба муҳим инфратузилма объектларига қаратилган бўлиши мумкин. Хусусан, “Стрый” газ кони ва газ омбори нишонга олингани тахмин қилинмоқда.
Украина Ташқи ишлар вазири Андрей Сибига эса БМТ Хавфсизлик Кенгашининг шошилинч йиғилишини чақириш, шунингдек, Украина–НАТО Кенгаши ва Европа ташкилотлари доирасида қўшма чоралар кўришга чақирган.
Эслатиб ўтамиз, Россия аввалроқ ҳам — 2024 йил 20 ноябрдан 21 ноябрга ўтар кечаси Днепр шаҳрига зарба беришда “Орешник” ракетасидан фойдаланган эди. Ўшанда Владимир Путин уни ядровий бўлмаган гипертовушли баллистик ракета деб таърифлаган.
