Ijtimoiy tarmoqlarda o‘zini xalq tabobati bilan shug‘ullanuvchi “mutaxassis” sifatida tanitib kelgan Iqbol Saliyevda mazkur faoliyatni amalga oshirish uchun qonunan talab etiladigan litsenziya mavjud emasligi ma’lum bo‘ldi.
Ma’lum qilinishicha, Saliyev O‘zbekiston Xalq tabobati assotsiatsiyasi a’zoligi haqidagi guvohnomaga ega bo‘lsa-da, ushbu hujjat tibbiy xizmat ko‘rsatish huquqini bermaydi. Amaldagi qonunchilikka ko‘ra, xalq tabobati usullari orqali tibbiy faoliyat bilan shug‘ullanish faqat Sog‘liqni saqlash vazirligi tomonidan beriladigan litsenziya asosida mumkin.
Shuningdek, bunday xizmatlarni ko‘rsatish uchun inson anatomiyasi, fiziologiyasi, farmakologiya, diagnostika hamda birinchi tibbiy yordam bo‘yicha maxsus o‘quv kurslarini tamomlash talab etiladi.
Sog‘liqni saqlash vazirligi ma’lumotiga ko‘ra, Iqbol Saliyevda xalq tabobati usullarini qo‘llash orqali tibbiy xizmat ko‘rsatish litsenziyasi mavjud emas. Xalq tabobati assotsiatsiyasi esa mazkur faoliyat bo‘yicha litsenziya berishga vakolatli organ hisoblanmaydi.
Ma’lumot o‘rnida: Jinoyat ishlari bo‘yicha Qo‘qon shahar sudining 2025 yil 17 dekabrdagi qarori bilan Saliyev Iqbol Pulatovich xalq tabobati to‘g‘risidagi qonunchilikni buzgani uchun MJtKning 59–5-moddasi 3-qismi asosida 10 sutka ma’muriy qamoq jazosiga tortilgan.
Mutaxassislar fuqarolarni tibbiy xizmat olishda hushyor bo‘lishga, faqat litsenziyaga ega muassasa va shaxslarga murojaat qilishga chaqirmoqda.
