Biroq keyinchalik havo harorati keskin ko'tarilishi mumkin.
Sinoptiklar prognoziga ko'ra, iyun oyining dastlabki kunlarida ayrim hududlarda qisqa muddatli yomg'ir va momaqaldiroq kuzatiladi. Havo harorati kunduzi 30-35 daraja atrofida bo'ladi.
Oyning ikkinchi yarmidan boshlab esa harorat 34-39 darajagacha ko'tarilishi, shimoliy, janubiy va cho'l hududlarda ayrim kunlari 40-42 darajaga yetishi mumkin.
“O'zgidromet” qayd etishicha, bu yil yoz ekstremal issiq bo'lishi ehtimoli ham mavjud. Bunga Tinch okeanida kuzatilayotgan El-Nino hodisasining ilk belgilari sabab bo'lishi mumkin.
Dastlabki baholashlarga ko'ra, joriy yilda yozning o'rtacha harorati me'yordan biroz yuqori bo'ladi. Eng issiq kunlarda havo harorati 42-44 darajagacha, janubiy va cho'l hududlarda esa 45-47 darajagacha ko'tarilishi mumkin.
Ma'lumot uchun, O'zbekistonda iyun oyida kuzatilgan eng yuqori harorat 1914 yilda Termiz shahrida qayd etilgan bo'lib, u 49,6 darajani tashkil qilgan.
