O‘zbekiston aholisining o‘rtacha yoshi 29,5 yoshni tashkil qildi. Bu haqda Milliy statistika qo‘mitasi ma’lum qildi.
Qayd etilishicha, 2026 yil 1 yanvar holatiga respublika aholisining o‘rtacha yoshi 29,5 yoshga yetgan.
Hududlar kesimida eng yuqori ko‘rsatkich Toshkent shahrida qayd etilgan bo‘lib, poytaxt aholisining o‘rtacha yoshi 32,7 yoshni tashkil qilgan.
Keyingi o‘rinlarda Buxoro viloyati (31,1 yosh), Toshkent viloyati (31 yosh), Navoiy viloyati (30,1 yosh) va Farg‘ona viloyati (30 yosh) qayd etilgan.
Eng past ko‘rsatkich esa Surxondaryo viloyati hissasiga to‘g‘ri kelib, ushbu hudud aholisining o‘rtacha yoshi 27,4 yoshni tashkil etgan. Shuningdek, Qashqadaryo viloyatida bu ko‘rsatkich 27,7 yosh, Jizzax viloyatida 28,4 yosh va Samarqand viloyatida 28,5 yosh bo‘lgan.
Qolgan hududlarda aholining o‘rtacha yoshi quyidagicha shakllangan:
— Qoraqalpog‘iston Respublikasi – 29,8 yosh;
— Andijon viloyati – 29,5 yosh;
— Xorazm viloyati – 29,5 yosh;
— Namangan viloyati – 29 yosh;
— Sirdaryo viloyati – 28,7 yosh.
