DXX Chegara qo‘shinlari harbiy xizmatchilari tomonidan davlat chegarasini qo‘riqlash va uning daxlsizligini ta’minlashga qaratilgan tezkor-profilaktik tadbirlar davomida noqonuniy holat fosh etildi.
Ma’lum qilinishicha, Sirdaryo daryosining Farg‘ona viloyati Beshariq tumanidagi Shodiqoziq MFY hududidan o‘tuvchi qismi qirg‘og‘ida noma’lum shaxslar tomonidan qoldirib ketilgan 4 ta polietilen qop aniqlandi.
Mazkur qoplar xolislar ishtirokida ko‘zdan kechirilganda, ular ichida qo‘shni davlatdan kontrabanda yo‘li bilan olib o‘tilgan giyohvandlik vositalari borligi ma’lum bo‘ldi. Jumladan, jami 48 o‘ramda 47 kg 113 gramm "gashish", 15 o‘ramda 7 kg 779 gramm "opiy" aniqlandi.
Shuningdek, qoplardan 10 710 dona "Lidaza" va 756 dona "Tenoksikam" nomli dori vositalari ham topilib, protsessual tartibda rasmiylashtirib olindi.
Mazkur holat yuzasidan Jinoyat kodeksining 246-moddasi 2-qismi (kontrabanda) bilan jinoyat ishi qo‘zg‘atildi.
Hozirda tergov harakatlari davom etmoqda. Narkotik moddalar egalarini aniqlish bo‘yicha zarur chora-tadbirlar ko‘rilmoqda.
