O‘zbekistonda aholisi eng ko‘p bo‘lgan tuman va shaharlar reytingi e’lon qilindi. Bu haqda Milliy statistika qo‘mitasi ma’lum qildi.
Qayd etilishicha, 2026 yil 1 aprel holatiga ko‘ra, mamlakatning doimiy aholisi soni qariyb 38,4 million nafarga etgan.
Statistikaga ko‘ra, aholisi eng ko‘p hududlar reytingida birinchi o‘rinni Namangan shahri egallagan. Hozirda shaharda 731,3 ming nafar aholi istiqomat qiladi.
Ikkinchi o‘rindan Samarqand shahri joy olgan bo‘lib, u yerda 607,6 ming nafar kishi yashaydi. Keyingi pog‘onada esa Samarqand viloyatining Urgut tumani qayd etilgan. Tuman aholisi soni 588,6 ming nafarni tashkil qilgan.
Shuningdek, reytingning yuqori qismida Andijon shahri (506 ming nafar) hamda Surxondaryo viloyatining Denov tumani (442,7 ming nafar) qayd etilgan.
Toshkent shahridan uchta tuman — Olmazor tumani (419,6 ming nafar), Yunusobod tumani (395 ming nafar) va Shayxontohur tumani (374,6 ming nafar) mamlakatning eng aholi gavjum hududlari qatoriga kiritilgan.
Ro‘yxatdan, shuningdek, Samarqand viloyatining Pastdarg‘om tumani 401,5 ming nafar va Andijon viloyatining Asaka tumani 369,6 ming nafar aholi bilan o‘rin olgan.
Shu tariqa, Namangan shahri nafaqat boshqa viloyat markazlarini, balki Toshkent shahrining eng yirik tumanlarini ham ortda qoldirib, O‘zbekistonning eng aholi gavjum hududi sifatida qayd etildi.
Avvalroq Milliy statistika qo‘mitasi hududlar kesimida aholi soni eng ko‘p bo‘lgan viloyat ham ma’lum qilgan edi. Unga ko‘ra, Samarqand viloyati 4 million 396,8 ming nafar doimiy aholi bilan respublikada birinchi o‘rinni egallagan.
