Poytaxtimizdagi Xalqaro hamkorlik markazida Amerika – O`zbekiston savdo palatasining navbatdagi majlisi bo`lib o`tdi.
Tadbirda ikki mamlakatning tashqi iqtisodiy aloqalar, bank-moliya, neft-gaz, mashinasozlik, savdo-sanoat, sarmoya, transport va transport kommunikasiyalari, logistika, geologiya va mineral resurslar, metallurgiya, kimyo va oziq-ovqat sanoati, sayyohlik, qishloq va suv xo`jaligi, elektron mahsulotlar ishlab chiqarish, yuqori texnologiyalar, ta`lim hamda axborot texnologiyalari kabi sohalar uchun mas`ul vazirlik va idoralari, kompaniya va konsernlari rahbarlari ishtirok etdi.
O`zbekiston Respublikasi tashqi iqtisodiy aloqalar, investisiyalar va savdo vaziri Elyor G`aniev O`zbekiston bilan AQSh o`rtasidagi aloqalar barcha jabhalarda, jumladan, savdo-iqtisodiy sohada ham izchil rivojlanib borayotgani, ushbu majlis o`zaro hamkorlikning yangi imkoniyatlarini ishga solishga xizmat qilishini alohida ta`kidladi.
Mamlakatlarimiz o`rtasidagi o`zaro savdo aylanmasi yil sayin oshib bormoqda. 2016 yilda o`zaro tovar ayirboshlash hajmi 453,8 million dollarni tashkil qildi.
O`zaro munosabatlarda savdo-iqtisodiy va sarmoyaviy hamkorlik ustuvor ahamiyatga ega. AQShning “Coca-Cola International”, “General Electric”, “CNH Industrial”, “Honeywell”, “US Inc.” kabi ko`plab kompaniyalari O`zbekistonda yirik investisiyaviy loyihalarni amalga oshirib kelmoqda.
Tadbirda AQShning o`ttizdan ziyod yirik kompaniyalari vakillari ishtirok etdi.
