​Toshkentda Dmitriy Dyujev ishtirokidagi 11 daqiqalik filmning yopiq premerasi bo`lib o`tdi

Rossiyalik taniqli kino va teatr aktyori, rejissyor, «Brigada», «Jmurki», «Ostrov» kabi serial va filmlarda bosh qahramon obrazini yaratgan Dmitriy Dyujev Toshkentga kelgani, o`zbekistonlik san`atkorlar — Ra`no Shodieva va Karim Mirhodiev bilan birga O`zbekiston davlat san`at va madaniyat institutining birinchi bosqich talabasi Muxlisa Azizovaning ishchi nomi «U» («Ona») bo`lgan filmida suratga tushgani haqida avval ham xabar bergan edik.

Mazkur qisqa metrajli filmning ovozlashtirish hamda montaj jarayonlari nihoyasiga etdi. Filmning yopiq premerasi bo`lib o`tdi. Yopiq premerada film ijodkorlari hamda taniqli o`zbek rejissyorlari ishtirok etishdi.

Filmning uzviy davomiyligi 11 daqiqani tashkil qiladi.

Film prodyuseri Oybek Abdushukurovning ma`lumotlarga ko`ra, ovozlashtirish xamda filmning tasvir echimi Moskva shahrining yirik kompaniyalarida amalga oshirilgan. Rossiyaning «Festagent» kompaniyasi bilan film 100 dan ortik xalkaro festivallarga yuborish buyicha shartnoma imzolandi.

Tez kunda filmning jamoatchilik uchun mo`ljallangan premerasi ham bo`lishi rejalashtirilgan bo`lib, unga Dmitriy Dyujevning tashrifi ham kutilmoqda.

Ma`lumot uchun, HD CINEMA kinokompaniyasi tomonidan suratga olingan filmning loyiha va g`oya muallifi — Abdujamil Sodiqov, ssenariy mualliflari — Dilmurod Masaidov, Mansur Vasati, operator — Dilmurod Turdiboev, prodyuser — Oybek Abdushukurov.