Oynai jahon orqali, konsert, klip, filmlarda ishtirok etgan mashhur insonlarni kuzatamiz-da, ularning tashvish yo`q, barchasi bir tekisda davom etayapti deb o`ylaymiz. Vaholanki, hech kim kundalik, hayotiy tashvishlar, turli asabbuzar vaziyatlardan himoyalanmagan. Xo`sh, mashhurlarning asab tolalarini taranglashishiga nimalar sabab bo`ladi? Javoblarni birgalikda o`qiymiz.
«IShDA REJA BO`LMASA»
Ayub Shahobiddinov, rejissyor: — Hayotda juda og`ir-bosiq insonman. Ammo masala ishga kelib taqalganda asabimni buzish juda oson. Masalan, ishda tartib bo`lmasa, rejaga amal qilinmasa, asabiylashishim aniq.
«YuLDUZLIK KASALIGI»GA ChALINIShSA»
Narimon Sultonxo`jaev, klipmeyker: — Ishimiz mashhurlar bilan bog`liq. Ular bilan kunda gaplashib, ish borasida mulohaza almashaman, uchrashuvlar olib boraman. Ana shunday vaziyatlarda birovga nisbatan bepisandlik bilan qaragan, xalqqa tanilib kimligini unutib qo`ygan, bir so`z bilan aytganda «yulduzlik kasali»ga chalinganlarni ko`rsam diqqatim oshadi.
«BOLAM XASTALANSA...»
Feruza Sobitova, aktrisa: — Bugungi kunda hamma narsada tezlik bor. Doim shoshib yuramiz. Tan olishim kerak ko`p narsalarga asabim buziladigan bo`lib qolgan. Misol uchun, yaqin insonlarim meni noto`g`ri tushunishsa, bolam xastalansa, tasvirga olish jarayonida hamkasblarim kech qolib ma`suliyatsizlik qilsa... Lekin har qanday holatda ham asabni asarash kerak. Chunki ko`p narsa asabga bog`liq.
«KAM UHLASAM...»
Munojat Alimboeva, aktrisa: — Kam uxlasam sal narsaga ham asabiylashib yuraman. Bundan tashqari, aytilgan joyga qandaydir sabablar bilan kech qolayotgan bo`lsam ham asablarim «ishga tushadi».
«TUHMAT VA G`IYBATDAN»
Muqaddas Sa`dullaeva, aktrisa: — Tuhmat, yolg`on va g`iybatdan tepa sochim tikka bo`ladi. Ayniqsa odamlar san`atkorlarni aslida qanday ekanini bilmay turib, turli mish-mish tarqatishsa, g`iybatlar bilan hayotiga aralashaversa bundan yomoni yo`q.
«KIMSIZ?» DEYIShSA!»
Anvar Sanaev, xonanda: — Menga qo`ng`iroq qilib, «Kim bu?» deyishsa, juda asabiylashaman. Odam qaerga, kimga qo`ng`iroq qilayotganini bila turib ham shunday ahmoqona savol berishi mumkinmi? Yana odamlar «Nega televizorda ko`rinmaysiz?» deyishganida hayron bo`laman. Aslida, har kuni kliplarim aylanayapti! O`zlari ko`rmay, bilmay turib savol berishadi.
«QORNIM OChSA»
Umidaxon, xonanda: — Tabiatdan xushchaqchaq, quvnoq qizman. Shuning uchun diqqatimni oshirish biroo-oz qiyin. Biroq qornim ochsa bormi? Umuman boshqa insonga aylanaman. Ul-bul egulik tanovul qilib olmagunimcha jig`ibiyron bo`laveraman.
«MAS`ULIYaTSIZLIKDAN»
Anvar Sobirov, xonanda: — Ko`pincha insonlardagi mas`uliyatsizlikdan ta`bim tirriq bo`ladi. Inson qanday sohada faoliyat yuritmasin, avvalam bor ishiga mas`uliyat bilan qarashi shart deb bilaman. Shuningdek, san`atni tijoratga aylantirganlarni ko`rsam jinim qo`ziydi.
«SOHTA MUNOSABATDAN»
Feruza Normatova, aktrisa: — Institutda o`qigan paytlarimiz ustozimiz Jo`ra Mahmudov sezish, his etish kabi psixologik mavzulardan chuqur ta`lim bergan. Balki shuning uchundir insonlardagi sohtalikni tezda sezib olaman. Agar suhbatdoshim yoki hamkasblar davrasida kimlardir sohta mulozamat qilayotganini bilsam, asabiylashib ketaman.
«VA`DAGA VAFO QILMASA»
Muhammadali Iskandarov, aktyor va klipmeyker: — Har doim, har qanday vaziyatda o`zimni qo`lga olishga intilaman. Ammo shunday vaziyatlar bo`ladiki... Masalan, gapirgan gapida turmagan insonlar tufayli asabiylashaman. Nazarimda har bir inson bergan va`dasini bajarishi shart!
Aliya SULAYMANOVA tayyorladi.
