Fransiyaning yangi prezidenti Emmanuel Makron o`tgan haftada butun dunyo hamjamiyati diqqat-e`tibori markazida bo`ldi. gap shundaki, Fransiyaning yangi prezidenti o`zidan 24 yosh katta bo`lgan sobiq o`qituvchisiga uylangan. Emmanuel 15 yoshida Bridjit ismli o`qituvchini sevib qolgan. U birinchi muhabbatining visoliga erishishni uzoq yillar sabrsizlik bilan kutdi.
Emmanuel 17 yoshga to`lgan paytda Bridjitga qarata: “Nima qilsangiz ham, mendan o`zingizni qancha olib qochsangiz ham, men baribir sizga uylanaman”, degan edi.
O`sha paytda Bridjit turmush o`rtog`i bilan uch nafar farzandni voyaga etkazayotgan edi. U sobiq o`quvchisining izhorini shunchaki xavasga yo`yardi.
Biroq, Emmanuel va Bridjitning munosabatlari kutilmaganda yangi burilish kasb etdi.
2007 yilda Bridjit eri bilan ajrashdi va Emmanuelga turmushga chiqdi.
Yangi eri boshi bilan siyosatga sho`ng`iganida madam Makron Parijdagi diniy maktabda dars berish bilan shug`ullandi.
Juftlikning farzandlari yo`q, biroq Emmanuel rafiqasining nevaralarini o`zinikidek ko`radi, ularga samimiy mehr ko`rsatadi.
Makronning bolalar butilkasi bilan sayr qilayotgan suratlari bosma nashrlarda chop etilgach, saylovchi ayollar uning mehribonligi va g`amxo`rligi oldida “taslim bo`lishdi”.
Bridjit ham Fransiyaning modaga oid jurnallari tomonidan “uslub qirolichasi” ta`rifiga loyiq ko`rilgan.
