O`zbekiston Respublikasi Prezidenti Shavkat Mirziyoev 21 may kuni Saudiya Arabistonining Ar-Riyod shahrida bo`lib o`tgan Arab-musulmon mamlakatlari va AQSh sammitida ishtirok etdi.
Mazkur forum ekstremizm va terrorizmga qarshi kurashish, bag`rikenglik g`oyalarini ilgari surish, xavfsizlik, barqarorlik va hamkorlikni mustahkamlash masalalariga bag`ishlandi.
Sammit doirasida Prezidentimiz Shavkat Mirziyoev bir qator davlat rahbarlari bilan muloqotda bo`ldi, deb yozadi O`zA.
Amerika Qo`shma Shtatlari Prezidenti Donald Tramp davlatimiz rahbari bilan uchrashuvda O`zbekistonda olib borilayotgan islohotlar jarayonini yuqori baholadi.
Prezident Shavkat Mirziyoev Ozarbayjon Respublikasi Prezidenti Ilhom Aliev, Qozog`iston Respublikasi Prezidenti Nursulton Nazarboev, Tojikiston Respublikasi Prezidenti Imomali Rahmon, Afg`oniston Islom Respublikasi Prezidenti Ashraf G`ani, Pokiston Islom Respublikasi Bosh vaziri Navoz Sharif, Turkiya Respublikasi tashqi ishlar vaziri Mevlud Chovusho`g`li bilan uchrashib, davlatlarimiz o`rtasidagi hamkorlikni yanada kengaytirish yuzasidan fikr almashdi.
O`zbekiston Respublikasi Prezidenti Shavkat Mirziyoev Saudiya Arabistoniga tashrifi davomida Islom taraqqiyot banki Prezidenti Bandar Hajar bilan uchrashdi.
