Kinematografiyani rivojlantirish markazi qisqa metrajli filmlar loyihalari uchun tanlov e`lon qildi.
Tanlovda o`zi taqdim etgan loyiha asosida qisqa metrajli filmni suratga olishni istovchi barcha yoshdagi professional va havaskor ijodkorlar qatnashishi mumkin.
Tanlovda ishtirok etish uchun Kinematografiyani rivojlantirish markazining www.krm.uz veb-sayti va Facebook ijtimoiy tarmog`idagi sahifasida joylashtirilgan shaklda to`ldirilgan ariza va unga ilova qilinadigan hujjatlar taqdim etiladi.
Hujjatlarni taqdim etish shartlari va namunalari, tanlov o`tkazish tartibi va shartlari, talabgorlar tomonidan taqdim qilinadigan materiallarni baholash mezonlari, shuningdek boshqa zaruriy ma`lumotlar bilan Markazning yuqorida qayd etilgan veb-sayti va internet tarmog`idagi sahifasida joylashtirilgan “Qisqa metrajli filmlar loyihalari tanlovi to`g`risida”gi Nizomida tanishish mumkin.
Markaz quyidagi loyihalarni ko`rib chiqmaydi:
Markaz tanlovda g`olib bo`lgan eng yaxshi qisqa metrajli film loyihasini moliyalashtirish bilan birga loyihani taqdim etgan ijodkorga filmni ishlab chiqarish ishlariga ko`maklashadi va yaratilgan filmni mahalliy va nufuzli xalqaro kinofestivallarda qatnashishini ta`minlaydi.
Hujjatlar 2017 yil 1 iyundan 25 iyungacha qabul qilinadi.
Hujjatlar “Kinematografiyani rivojlantirish markazi” nomiga “O`zbekiston pochtasi” orqali yuboriladigan muhrlangan konvertda yoki 100100, Toshkent shahri, Muqimiy ko`chasi, 8-uy manzili bo`yicha qabul qilinadi. Ma`lumot uchun telefonlar: (0-371) 230-91-91, 253-48-17.
Eslatib o`tamiz, Kinematografiyani rivojlantirish markazi O`zbekiston Davlat san`at va madaniyat instituti talabasi, yosh rejissyor Muxlisa Azizovaning qisqa metrajli “U” (“Ona”) nomli filmini suratga olishga ko`maklashgan.
Mazkur film 70-Kann kinofestivalining qisqa metrajli filmlar burchagida (Short Film Corner) ko`plab professional ijodkorlarning asarlari qatorida namoyish qilindi.
